Actualidade | Economía

O Consello da Xunta informou da resolución do novo programa Nexos, que mobilizará case 40 millóns de euros en investimento total e reforzará a colaboración entre empresas e centros de coñecemento en ámbitos estratéxicos

O presidente da Xunta, Alfonso Rueda, anunciou a resolución do novo programa Nexos, que permitirá apoiar con case 23 millóns de euros un total de 37 proxectos de I+D+i nos que participan 138 empresas galegas en colaboración con distintos centros de coñecemento.

Segundo explicou, a convocatoria, financiada pola Consellería de Educación, Ciencia, Universidades e FP, mobilizará un investimento total de 39,8 millóns de euros entre 2026 e 2028, no marco do Plan galego de investigación e innovación 2025-2027.

Os proxectos serán desenvolvidos por agrupacións de empresas formadas por un máximo de seis pemes e un mínimo de tres. Do total, 25 corresponden a desenvolvemento experimental, 10 a investigación industrial e dous a innovación organizativa e de procesos.

En canto aos ámbitos estratéxicos, 11 proxectos céntranse en economía circular e enerxía, 10 en fabricación avanzada, nove en agroalimentación, catro en benestar e saúde e tres noutras áreas consideradas prioritarias. A selección tivo en conta, ademais, a capacidade das entidades beneficiarias para xerar rendibilidade e impacto económico en Galicia.

O programa Nexos enmárcase no Galicia Feder 2021-2027 e contará con intensidades de axuda que oscilan entre o 40% e o 60% do orzamento subvencionable, que poderá situarse entre os 500.000 e 1,5 millóns de euros por proxecto. As axudas cubrirán tanto custos directos —persoal, equipamento, materiais, subcontratacións ou adquisición de patentes— como custos indirectos.

Esta liña intégrase no programa Activa I+D+i, co que a Xunta pretende reforzar a capacidade científico-técnica do tecido empresarial, fomentar a cooperación público-privada e facilitar a transferencia real de coñecemento cara ás pequenas e medianas empresas.