Actualidade

Destinaranse 30 millóns de euros á restauración de infraestruturas públicas, reposición de equipamento danado e construción ou mellora de bases aéreas

A Xunta destinará 30 millóns de euros á reconstrución de infraestruturas e bases aéreas nas zonas afectadas polos incendios forestais. Galicia reprograma máis do 10 % dos fondos Feder cara a novas prioridades estratéxicas como a vivenda, a innovación e a resiliencia hídrica.

O presidente da Xunta, Alfonso Rueda, anunciou hoxe que o Consello aprobou a reprogramación dunha parte dos fondos Feder para destinar 30 millóns de euros á reconstrución das zonas afectadas pola onda de incendios forestais en Galicia.
A medida enmárcase nunha reorientación máis ampla dos programas Feder e FSE 2021-2027, adaptada ao novo contexto europeo e global, co obxectivo de reforzar a competitividade, reducir dependencias externas, promover a innovación e avanzar na descarbonización.

Esta modificación, consensuada coa Comisión Europea, axústase ao novo Regulamento (UE) 2025/1914, que permite redirixir fondos cara ás prioridades actuais da Unión.
Entre as novidades destaca o mecanismo Restore, que posibilita dedicar o 3 % da axuda Feder á reconstrución de zonas afectadas por catástrofes naturais, como os incendios do pasado verán.

Segundo explicou Rueda, financiaranse actuacións de restauración hidrolóxica e ambiental, a reposición de equipamentos danados e a construción ou mellora de bases aéreas para a loita contra incendios.
Entre as actuacións previstas inclúense as infraestruturas no aeródromo de Antela (Sandiás), a base aérea de Setecoros (Valga) e a base de Campiño (Pontevedra).

O presidente destacou que Galicia é a comunidade máis avanzada na reprogramación de fondos europeos, o que permitirá recibir un anticipo adicional do 1,5 % e elevar a cofinanciación europea ata o 70 % nas novas prioridades.

Ademais, amplíase o período de elixibilidade do gasto ata o 31 de decembro de 2030, e anticiparase o 20 % das cantidades asignadas.
En total, dos 1.400 millóns que Galicia ten asignados entre os programas Feder e FSE, 118 millóns reorientaranse para responder a novos desafíos.

A reprogramación tamén reforza liñas vinculadas á vivenda accesible, á innovación tecnolóxica, ás capacidades de defensa e uso dual e á resiliencia hídrica, así como á mellora da competitividade e descarbonización da automoción galega.
No caso do FSE, incorpóranse medidas para desenvolver capacidades e cualificacións relacionadas coas tecnoloxías estratéxicas da UE e coa accesibilidade á vivenda.

“Galicia reafirma o seu compromiso co proxecto europeo e aproveita a flexibilidade do marco financeiro para avanzar cara aos novos retos da nosa comunidade e da Unión Europea”, concluíu Rueda.