Rueda anuncia un investimento de 2.000 millóns ata 2030 para acadar 10.000 vivendas públicas co II Pacto de Vivenda de Galicia
O presidente da Xunta, Alfonso Rueda, presidiu en Pontevedra a sinatura do II Pacto de Vivenda de Galicia, unha folla de ruta estratéxica que fixa como obxectivo acadar un parque público de 10.000 vivendas no ano 2030.
Segundo explicou, para cumprir esta meta a Administración autonómica realizará un esforzo inversor directo de case 2.000 millóns de euros ata finais da década. O acordo nace, segundo destacou, do “consenso co sector” no marco do Observatorio da Vivenda e céntrase na construción, rehabilitación e xestión de solo residencial en colaboración cos concellos.
Rueda agradeceu o compromiso dos 16 municipios que están a colaborar actualmente coa Xunta mediante a cesión gratuíta de parcelas para a construción de novos fogares. Neste contexto, lembrou que o Executivo galego marcouse ao inicio da lexislatura o obxectivo de duplicar o parque público de vivenda, pasando de 4.000 a 8.000 inmobles en 2028.
Na actualidade, segundo indicou, hai 3.000 vivendas en marcha en distintas fases de execución, ás que se sumarán outras 1.000 antes de que remate o ano. En 2026, asegurou, haberá xa familias que reciban as chaves do seu novo fogar.
O II Pacto de Vivenda dá continuidade ao plan iniciado en 2021, que rexistrou unha execución do 97,8 %, e establece un compromiso orzamentario cualificado polo presidente como “sen precedentes”. O acordo prevé mobilizar arredor de 5.000 millóns de euros de investimento privado, o que elevará o volume total, entre fondos públicos e privados, ata os 7.000 millóns de euros.
Este impulso permitirá, segundo as estimacións avanzadas polo presidente, xerar ou manter preto de 60.000 postos de traballo en Galicia. Rueda salientou que a colaboración público-privada será clave para afrontar este “enorme reto” e puxo en valor tamén o papel da arquitectura e da planificación urbana na execución do plan.
A estratexia inclúe medidas específicas de apoio á mocidade para facilitar a emancipación, potenciando fórmulas como os aloxamentos compartidos. “Galicia Calidade é tamén isto: facer vivenda, facela en prazo, facela ben e despois distribuíla ben entre quen máis o necesita e tamén entre quen máis o merece”, afirmou.