Rueda anuncia un plan de 157 millóns para apoiar sectores e familias pola crise en Oriente Medio
O presidente da Xunta, Alfonso Rueda, anunciou a activación dun plan de medidas dotado con 157 millóns de euros para apoiar aos sectores con máis dificultades e ás familias vulnerables ante os efectos da guerra en Oriente Medio.
O plan, aprobado polo Consello da Xunta, inclúe un total de 20 liñas de actuación que combinan medidas de apoio financeiro, protección social, transición enerxética e resiliencia económica, ademais de propostas dirixidas ao Estado e á Unión Europea.
Entre as actuacións máis urxentes destacan os 62 millóns de euros en préstamos destinados a empresas e pemes, a través do Instituto Galego de Promoción Económica (Igape), co obxectivo de garantir liquidez e facilitar a continuidade da actividade económica.
O plan contempla tamén máis de 44,9 millóns de euros para reforzar os sectores produtivos, especialmente o pesqueiro, que recibirá 25,5 millóns para modernizar infraestruturas portuarias e mellorar a cadea de frío, e o agrario, que contará con 19,4 millóns para impulsar a modernización das explotacións e a eficiencia produtiva.
No ámbito social, destínanse máis de 6 millóns de euros para apoiar aos fogares vulnerables mediante medidas como moratorias e axudas ao alugueiro, así como o reforzo de prestacións como o Bono Social Térmico ou a RISGA.
Ademais, o Goberno galego aposta pola eficiencia enerxética e a transición cara a un modelo máis sostible, cun investimento de 39,3 millóns de euros para rehabilitación de edificios, autoconsumo e impulso de comunidades enerxéticas.
O plan inclúe tamén 5 millóns de euros para a promoción turística de Galicia, co obxectivo de posicionar a comunidade como un destino seguro e de calidade fronte á inestabilidade doutros mercados internacionais.
Segundo explicou o conselleiro de Facenda, Miguel Corgos, a Xunta mantén contacto permanente cos clústeres empresariais para coñecer o impacto da crise e adaptar as medidas ás necesidades do tecido produtivo.
A iniciativa incorpora un sistema de seguimento e avaliación para garantir unha execución eficaz e coordinada, así como medidas de tramitación acelerada que permitirán resolver solicitudes de financiamento nun prazo máximo de dez días.
Ademais das actuacións autonómicas, o plan inclúe propostas ao Goberno central e á Unión Europea, como maior flexibilidade nos fondos, cofinanciación ao 100 % e novas liñas de apoio para sectores afectados pola crise enerxética e loxística.