Rueda anuncia un programa para reducir o abandono escolar centrado en homes e poboación inmigrante
O presidente da Xunta, Alfonso Rueda, anunciou a posta en marcha dun programa específico para reducir o abandono escolar, centrado principalmente nos homes e na poboación inmigrante sen titulación superior á ESO.
A iniciativa, denominada Cualifica Talento, busca actuar sobre un problema estrutural, especialmente entre a mocidade de entre 18 e 24 anos, co obxectivo de facilitar a súa reincorporación ao sistema educativo e mellorar a súa cualificación.
Segundo explicou o presidente autonómico, Galicia pechou 2025 cunha taxa de abandono escolar do 10,4 %, inferior á media estatal, aínda que recoñeceu que a cifra segue sendo elevada, especialmente no caso dos homes, onde alcanza o 13,5 %, fronte ao 7,2 % das mulleres.
O programa prevé a creación de equipos de orientación especializados nas sete grandes áreas urbanas, onde se concentra o 32 % da poboación destinataria. Estes equipos identificarán ás persoas que poden beneficiarse, ofrecerán asesoramento personalizado e promoverán a súa incorporación a distintas opcións formativas.
Entre estas alternativas inclúense a FP Básica Acelerada, a Educación Secundaria para persoas adultas ou a FP de grao medio e o Bacharelato en modalidade semipresencial, en función da situación de cada persoa.
No caso da poboación inmigrante, o plan contempla medidas específicas para favorecer a aprendizaxe das linguas cooficiais, principalmente a través das escolas oficiais de idiomas e centros públicos de educación de adultos.
Ademais, impulsarase a acreditación de competencias adquiridas mediante a experiencia laboral ou formación non formal, facilitando así o acceso a titulacións oficiais.
A iniciativa inclúe tamén a elaboración dunha guía de actuación para os equipos de orientación, co fin de coordinar o seu traballo e establecer criterios comúns.
Segundo a Xunta, o programa terá un alcance potencial de arredor de 10.000 persoas, das que se espera atender a 2.000 xa no próximo curso.
Cualifica Talento enmárcase no Plan FPGal 360 de orientación profesional e na Estratexia de Formación Profesional Galicia 2030, que buscan mellorar a cualificación da poboación e favorecer a súa inserción laboral.