Rueda aposta por captar talento da Galicia exterior con programas de retorno formativo
O presidente da Xunta, Alfonso Rueda, destacou a aposta do Goberno galego por captar talento da Galicia exterior co obxectivo de construír unha comunidade máis innovadora e competitiva.
Fíxoo durante o acto de entrega de diplomas ás persoas beneficiarias das Bolsas de Excelencia á Mocidade Exterior (BEME) e do programa Retorna Talento FP, onde puxo en valor o papel destas iniciativas para atraer mozas e mozos descendentes de galegos e galegas que residen no exterior.
Rueda subliñou que estes programas permiten cada ano a chegada a Galicia duns 250 estudantes para cursar másteres nas universidades galegas, procedentes de países como Arxentina, Uruguai, Cuba, Reino Unido, Francia, Irlanda ou República Checa.
Neste sentido, destacou o éxito das bolsas BEME, xa que o 80% das persoas beneficiarias optan por quedar en Galicia unha vez rematada a súa formación.
O presidente lembrou que xa está aberto o prazo da décima edición destas axudas, correspondente ao curso 2026/2027, que se pode solicitar ata o 30 de abril, cun investimento de 2,55 millóns de euros. Tamén permanece aberto o prazo para o programa Retorna Talento FP.
En total, a Xunta leva investidos máis de 15 millóns de euros nestas iniciativas, que permitirán superar no próximo ano os 2.000 estudantes retornados entre formación universitaria e Formación Profesional.
Ademais, Rueda destacou que a Estratexia Galicia Retorna ofrece un apoio integral ás persoas que regresan, con medidas como incentivos á contratación, axudas ao emprendemento e oficinas de asesoramento.
Tamén reclamou ao Goberno central axilizar a homologación de títulos universitarios para facilitar a inserción laboral das persoas retornadas.
Finalmente, o presidente incidiu en que Galicia é “unha terra de oportunidades e portas abertas” e anunciou a próxima apertura dunha nova sede da Xunta en Bos Aires para reforzar a conexión coa diáspora galega.