Rueda aposta por un turismo sostible na inauguración do Hotel Faro Silleiro en Baiona
O presidente da Xunta, Alfonso Rueda, participou hoxe na inauguración oficial do Hotel Faro Silleiro, en Baiona (Pontevedra), unha infraestrutura emblemática que converte un espazo histórico nun proxecto baseado no turismo sostible e diversificado.
Rueda sinalou que este hotel representa “un símbolo de Galicia, orgullosa da súa identidade e que aposta pola recuperación do patrimonio sen perder a alma”. Esta intervención culmina un proceso iniciado en 2021 coa rehabilitación do faro principal do enclave, que se suma á transformación do faro pequeno na Taberna Atlántica.
A Xunta destinou preto de 578.000 euros, procedentes dos fondos europeos Next Generation, para levar a cabo a actuación, que se integra nun modelo baseado na sustentabilidade, a cohesión territorial e a posta en valor do rural.
O presidente salientou que o novo hotel está situado no Camiño Portugués pola Costa, o terceiro itinerario máis transitado do Camiño de Santiago, con máis de 75.000 peregrinos en 2024. Galicia rexistrou o pasado ano máis de 8,3 millóns de visitantes, nun sector que representa o 11 % do PIB autonómico e que xera máis de 130.000 empregos.
Rueda concluíu salientando a excelencia do proxecto e o seu valor como froito do traballo ben feito e dunha boa planificación, e comprometeuse a seguir apoiando o sector turístico cun modelo sostible, rendible e desestacionalizado, que inclúe novas liñas de axudas por 20 millóns de euros en 2025.