Rueda destaca o labor de emerxencias, sanidade e seguridade que permitiu superar o apagón sen incidentes graves
O presidente da Xunta, Alfonso Rueda, agradeceu hoxe o traballo dos profesionais que participaron na resposta ao apagón que afectou a Galicia a pasada semana. Subliñou que a súa actuación foi clave para manter operativos os servizos esenciais e evitar consecuencias máis graves.
Durante o Consello da Xunta, o presidente detallou que se mobilizaron máis de mil persoas entre axentes da Policía Autonómica (300), brigadas forestais (700), agrupacións de voluntariado de protección civil (230) e efectivos da Garda Civil, Policía Nacional, policías locais, UME e servizos de emerxencia.
Os hospitais galegos atenderon máis de 2.000 urxencias, rexistraron 39 nacementos e realizaron preto de 600 cirurxías, suspendendo 259 intervencións programadas. Tamén se entregaron 73.100 litros de combustible extra para garantir o funcionamento dos xeradores.
O servizo 061 recibiu máis de 2.300 chamadas e levou a cabo case 1.000 intervencións, entre elas a atención a 121 persoas con problemas respiratorios ou necesidades de osíxeno nos seus domicilios.
As residencias de maiores e centros de atención á discapacidade rexistraron unha trintena de incidencias, todas leves, relacionadas co subministro de combustible ou osíxeno.
En materia educativa, Rueda explicou que se mantiveron abertos colexios e escolas infantís sen clases, permitindo a conciliación. Só o 3,5 % do alumnado de infantil e o 2,5 % do resto acudiu aos centros.
Perdas económicas e demanda de explicacións
Segundo estimacións do Foro Económico de Galicia, o apagón causou perdas de 200 millóns de euros na industria e nas empresas pola parada de produción, danos na maquinaria e perda de vendas. Sectores como a automoción, moi dependentes de provedores auxiliares, foron especialmente afectados.
Rueda agradeceu a coordinación co Goberno central durante a fase de emerxencia de nivel 3, pero instou a coñecer "canto antes" as causas do fallo eléctrico para evitar que se repita.