Rueda pide a colaboración do sector para alcanzar as 10.000 vivendas públicas en 2030
O presidente da Xunta, Alfonso Rueda, apelou á colaboración do sector inmobiliario e da construción para facer realidade o obxectivo de acadar as 10.000 vivendas públicas en Galicia no ano 2030. Así o sinalou durante a súa participación na XXX edición dos premios da Asociación de Promotores Inmobiliarios da provincia de Pontevedra (Aproin), celebrada en Vigo.
Durante o acto, Rueda felicitou ás persoas responsables dos proxectos premiados, aos que puxo como exemplo da profesionalidade do sector na comunidade.
O titular do Executivo autonómico destacou o “esforzo inédito” que está a realizar a Xunta para incrementar a oferta de vivenda. Neste sentido, explicou que xa hai arredor de 3.000 vivendas públicas en marcha dentro do obxectivo marcado para os próximos anos.
En relación ao desenvolvemento de solo, indicou que xa se iniciaron os trámites de 12 Proxectos de Interese Autonómico (PIA), que permitirán urbanizar ámbitos nos que promotores poderán construír ata 25.000 vivendas, das cales 20.000 serán protexidas.
Para complementar estas actuacións, Rueda destacou tamén a aposta pola rehabilitación de vivendas, pola simplificación administrativa e pola incorporación de novas técnicas construtivas, como a industrialización, que permiten reducir prazos e facer fronte á falta de man de obra especializada.
Neste ámbito, lembrou que a Xunta está a impulsar medidas para formar profesionais do sector, tanto a través de programas de microformación como mediante a Formación Profesional.