Rueda presenta os Orzamentos máis altos da historia de Galicia, con 14.240 millóns e un reforzo récord do gasto social
O presidente da Xunta, Alfonso Rueda, anunciou este xoves que o Consello deu luz verde ao proxecto de lei dos Orzamentos de Galicia para 2026, que alcanzan os 14.240 millóns de euros, un 2% máis que o pasado ano e supoñen as contas máis elevadas da historia da comunidade.
“Son uns orzamentos centrados nas persoas, para seguir fortalecendo e modernizando un Estado do Benestar que favoreza a igualdade entre todos os galegos e galegas”, afirmou Rueda, quen destacou que tres de cada catro euros destínanse a sanidade, educación, política social e emprego.
O gasto social acada os 10.588 millóns de euros, o que supón 321 millóns máis que en 2025 e un incremento do 3,1%.
A sanidade contará con 5.640 millóns, cun reforzo da atención primaria, da saúde mental e dos programas de prevención, así como a modernización dos hospitais de Montecelo, Ferrol, A Coruña, Santiago, Ourense e os comarcais da Mariña, Monforte, Barbanza e Verín.
En educación, o investimento ascende a 3.020 millóns, coa aposta por unha educación pública gratuíta e inclusiva, o reforzo da FP e melloras no transporte e comedores escolares.
A política social disporá de 1.482 millóns, destinados a reforzar a dependencia, ampliar prazas residenciais e consolidar a gratuídade das escolas infantís.
No ámbito do emprego, o Goberno galego destina 444 millóns para fomentar a creación de postos de traballo estables e cualificados, o retorno da mocidade emigrada e o apoio ao autónomo.
As contas tamén inclúen un impulso á vivenda pública, co obxectivo de acadar 8.000 vivendas comprometidas na lexislatura, así como novas rebaixas fiscais para familias monoparentais, rendas medias e baixas, persoas novas e colectivos vulnerables.
Rueda salientou que Galicia reforza os servizos públicos “sen que o esforzo económico se traduza en máis impostos”, e lembrou que por terceiro ano consecutivo non se recorrerá ao endebedamento, mantendo a solvencia das contas públicas.
A Xunta incrementa ademais un 9% os fondos destinados ao I+D+i, con máis de 400 millóns para proxectos como a Factoría IA, o CESGA ou o primeiro Centro de Protonterapia de Galicia.
O conselleiro de Facenda, Miguel Corgos, destacou que estes orzamentos “son a folla de ruta para dar resposta ás necesidades do país con estabilidade e responsabilidade”.
As contas de 2026 tamén reforzan os recursos propios ante o descenso dos fondos europeos MRR e destinan partidas para preparar o Xacobeo 2027, apoiar os concellos e mellorar a xestión do litoral.
“Son uns orzamentos cos que avanzamos na senda da estabilidade e seguimos construíndo unha Galicia próspera, sostible e preparada para os retos do presente e do futuro”, concluíu Rueda.