Rueda salienta a calidade do sector primario e do leite galego como sinal de identidade de Galicia
O presidente da Xunta, Alfonso Rueda, puxo en valor a calidade do sector primario galego e da leite producida en Galicia como unha das principais marcas que identifican á comunidade tanto dentro como fóra do país. “Se algo nos identifica é a calidade do noso sector primario, da leite galega e de todo o que ten que ver con este ámbito”, sinalou.
Durante a gala de entrega dos Premios Exceleite, celebrada en Santiago de Compostela, o presidente asegurou que todo o ecosistema vencellado ao sector lácteo —desde os gandeiros ata a industria transformadora ou o transporte— “é un tesouro que hai que coidar”, destacando o apoio continuo do Executivo autonómico.
Rueda subliñou que Galicia se consolidou como unha potencia leiteira de referencia internacional, situándose entre as dez principais rexións produtoras da Unión Europea. Tamén salientou o esforzo realizado polas explotacións en modernización, benestar animal, hixiene e produción ecolóxica, elementos clave dun campo moderno e competitivo. “Con menos granxas estase producindo máis leite grazas á concentración e á modernización das explotacións”, apuntou.
Apoio ao relevo xeracional
A pesar do bo momento do sector, con prezos en tendencia positiva e unha capacidade de transformación próxima ao 75 %, o presidente recoñeceu que o rural galego segue afrontando retos como a modernización continua e o relevo xeracional.
Neste contexto, lembrou que nos orzamentos de 2026 a Xunta destinará arredor de 24 millóns de euros para fomentar a incorporación de mozas ao campo e duplicará os fondos do programa de titorización e asesoramento. Ademais, destacou o apoio á transformación industrial, cun investimento de 19,6 millóns de euros, e ferramentas como o Banco de Explotacións para facilitar a continuidade das granxas.
Fondos europeos
Rueda reclamou tamén o mantemento dos fondos europeos destinados ao sector primario para garantir a súa competitividade. “Se queremos que Europa siga avanzando non podemos perder o sector primario nin o camiño de modernización iniciado; son necesarios recursos para non quedar atrás”, concluíu.
Os Premios Exceleite recoñeceron nesta edición dez premios a vinte galardoados, distribuídos en categorías segundo o sistema de produción —extensivo, semiextensivo e intensivo— e unha específica para explotacións ecolóxicas.