Rueda salienta en Oviedo a alianza entre Galicia e Asturias para afrontar os retos do noroeste
O presidente da Xunta de Galicia, Alfonso Rueda, participou este martes en Oviedo na presentación do libro Territorio de Encuentro, de Guillermo Martínez Suárez, onde enxalzou a historia, a cultura e a identidade compartida entre Galicia e Asturias.
Rueda salientou que ambas comunidades son “territorios irmáns”, unidas por unha forma de ser baseada no traballo ben feito, na serenidade e no orgullo de preservar as súas raíces. “Únenos moito máis ca xeografía: únenos a historia, a cultura e unha maneira común de mirar cara ao futuro”, afirmou.
O titular do Goberno galego destacou especialmente o Camiño Primitivo como símbolo desa irmandade, lembrando que une a Catedral de San Salvador de Oviedo coa de Santiago de Compostela. Nese sentido, lembrou que o pasado mes de abril se instalou un novo fito xacobeo na capital asturiana, que marca o inicio da ruta orixinal percorrida por Afonso II hai máis de mil anos.
Rueda sinalou ademais que o Camiño ten unha dimensión económica e social crecente: este ano máis de medio millón de peregrinos chegaron a Compostela, dos cales preto de 26.000 elixiron o Camiño Primitivo, un 14 % máis que en 2024. Neste contexto, subliñou que Asturias terá un papel destacado na celebración do Xacobeo 2027, que volverá situar o Camiño de Santiago no centro da atención internacional.
Durante a súa intervención, o presidente da Xunta puxo en valor a sintonía institucional entre Galicia e Asturias na defensa de intereses comúns, como o apoio ao sector pesqueiro, a aposta polas enerxías renovables, a loita contra o despoboamento ou o desenvolvemento do Corredor Atlántico Noroeste, infraestrutura que considerou “clave para garantir a igualdade de oportunidades e a competitividade do conxunto do noroeste español”.
Rueda concluíu convidando ao seu homólogo asturiano, Adrián Barbón, a “avanzar por un camiño de cooperación e excelencia cara a unha proxección optimista de futuro”, reivindicando a unidade histórica e a vontade compartida de construír conxuntamente os éxitos do mañá.