Rueda salienta o compromiso da Xunta coas familias monoparentais e o seu recoñecemento pioneiro en Galicia
O presidente da Xunta de Galicia, Alfonso Rueda, mantivo en Santiago de Compostela un encontro con representantes da Asociación de Familias Monomarentais de Galicia (Fagamos) e da Asociación Madres Solteras por Elección, no que puxo en valor o compromiso do Goberno galego coas familias monoparentais.
Na xuntanza, na que tamén participou a conselleira de Política Social e Igualdade, Fabiola García, Rueda lembrou que Galicia foi das primeiras comunidades en aprobar un recoñecemento específico para este tipo de fogares. Desde 2011 existe un certificado oficial que acredita a condición de familia monoparental e que permite acceder a distintos beneficios.
Entre estas medidas, destacou a puntuación adicional para acceder ás escolas infantís e ás casas niño, a protección preferente na vivenda de promoción autonómica, así como descontos nas tarifas do comedor escolar e nos campamentos xuvenís organizados pola Xunta.
O presidente lamentou que o Estado español aínda non conte cunha normativa que regule de maneira uniforme este tipo de fogares, o que xera diferenzas entre comunidades autónomas, e insistiu na necesidade de avanzar cara a un marco común.
Por último, lembrou que desde o vindeiro 1 de xaneiro as familias monoparentais galegas se beneficiarán da nova rebaixa fiscal para a compra de vivenda usada, froito da modificación do Imposto de Transmisións Patrimoniais (ITP). Esta medida reduce o tipo do 8% ao 3%, podendo chegar mesmo ao 0% no caso de inmobles situados en zonas pouco poboadas. A rebaixa non se aplica á compra de vivenda nova, que tributa a través do IVE.