Sánchez propón en Ourense un Pacto de Estado fronte á Emerxencia Climática
O presidente do Goberno central, Pedro Sánchez, e o presidente da Xunta de Galicia, Alfonso Rueda, visitaron este domingo o Centro de Coordinación Provincial de loita contra incendios de Ourense, nun dos días máis complicados da vaga de lumes que afecta a Galicia e a outras zonas do país.
Durante a súa intervención, Sánchez atribuíu a intensidade e frecuencia destes incendios ao cambio climático e apelou á necesidade dun “gran Pacto de Estado fronte á Emerxencia Climática”. O mandatario destacou que a situación “interpélanos a todas as Administracións Públicas, aos Grupos Parlamentarios e ao conxunto da cidadanía” e subliñou que a resposta debe darse “da man da Ciencia e coa vista posta tanto na prevención como na mellora das capacidades de resposta”.
“Debemos reflexionar sobre como redimensionar os nosos recursos, non só para actuar cando o lume xa está declarado, senón tamén para reforzar a prevención”, sinalou o presidente do Goberno.
Pola súa parte, Alfonso Rueda reclamou a incorporación inmediata do Exército ao dispositivo de loita contra os incendios en Galicia. “As Forzas Armadas, xunto co resto de efectivos, poden desempeñar unha labor fundamental nestes momentos”, asegurou.
O titular da Xunta expresou ademais a súa esperanza de que as demandas formuladas sexan atendidas con rapidez: “É unha petición lóxica e confío en que se materialice coa maior brevidade posible”.