Sanidade inviste 1,8 millóns en novas ferramentas de intelixencia artificial para mellorar a atención sanitaria
O conselleiro de Sanidade, Antonio Gómez Caamaño, anunciou este martes en Santiago a licitación de dous contratos por un importe total de 1,8 millóns de euros, destinados ao desenvolvemento de novos servizos de intelixencia artificial (IA) no sistema público de saúde galego. O obxectivo é mellorar a calidade asistencial mediante ferramentas que axuden a axilizar a elaboración de informes médicos, apoiar a toma de decisións clínicas e resolver dúbidas da cidadanía.
Acompañado polo director xeral de Asistencia Sanitaria do Sergas, Alfredo Silva, e o subdirector de Sistemas e Tecnoloxías da Información, Benigno Rosón, o conselleiro destacou a importancia de manter o equilibrio entre innovación e control para garantir que a transformación dixital teña un impacto positivo no día a día de profesionais e pacientes.
O primeiro contrato céntrase no desenvolvemento dun servizo de control preventivo para pacientes con diabetes, con ferramentas que permitan a detección temperá en menores de 35 anos mediante a análise automática da súa información clínica. Actualmente, preto de 12.000 pacientes xa forman parte da plataforma E-diabetes, que recolle datos glicémicos para identificar variacións e mellorar o seguimento da enfermidade.
O segundo contrato contempla a adquisición de servizos de apoio diagnóstico mediante algoritmos e o desenvolvemento dunha plataforma de IA xerativa. Esta ferramenta permitirá, entre outras utilidades, resolver dúbidas sobre tratamentos, axudar na interpretación de informes médicos, resumir historias clínicas e xerar propostas de informes de alta. Tamén se facilitarán consultas personalizadas que aforren tempo aos profesionais sanitarios.
Estas solucións comezarán a implantarse na segunda metade de 2026 e estarán integradas na historia clínica electrónica e na aplicación SergasMóbil. Segundo Benigno Rosón, estas ferramentas serán extrapolables a outras comunidades autónomas.
Gómez Caamaño salientou que Galicia é pioneira ao contar cunha lei específica sobre IA e cun plan de transformación dixital dotado con 200 millóns de euros, co paciente como eixo central.