Sanidade recomenda extremar precaucións pola onda de calor
A Consellería de Sanidade vén de recomendar a adopción de medidas de precaución ante o episodio de altas temperaturas que afecta xa a boa parte de Galicia e que se manterá nos vindeiros días.
En concreto, 38 concellos do noroeste da provincia da Coruña atópanse en nivel 2 de alerta por calor entre o 16 e o 18 de xuño, segundo os datos do Ministerio de Sanidade. Entre eles están municipios como Abegondo, Arteixo, Betanzos, Carballo, A Coruña, Ferrol ou Narón.
A previsión meteorolóxica anuncia que o ascenso térmico continuará e poderán alcanzarse os 40º C en puntos de Ourense durante o martes e o mércores. En moitas comarcas superaranse os 34 ou 36 graos.
A Dirección Xeral de Saúde Pública lembra que as altas temperaturas non afectan a toda a poboación por igual, polo que é importante prestar atención especial aos grupos de risco: persoas maiores de 65 anos, crianzas menores de 4 anos (especialmente menores de 1), persoas con enfermidades crónicas, deportistas ou traballadores ao aire libre.
As principais recomendacións sanitarias inclúen:
-
Beber máis líquidos, evitando bebidas quentes ou azucaradas.
-
Aumentar o consumo de froitas e verduras.
-
Evitar comidas copiosas e conservar os alimentos no frigorífico.
-
Usar roupa lixeira e de cores claras.
-
Empregar protección solar e permanecer en espazos frescos ou ventilados.
-
Evitar a exposición ao sol nas horas centrais do día.
A Consellería pon a disposición da cidadanía unha guía completa con consellos a través da web: Recomendacións fronte á calor - Sergas