Santiago acolle os Xogos Autonómicos de Special Olympics Galicia
As pistas de atletismo do Campus Sur da Universidade de Santiago acollerán este sábado 26 de abril a 25ª edición dos Xogos Autonómicos de Deportes Minoritarios para persoas con discapacidade intelectual, organizados por Special Olympics Galicia coa colaboración de FADEMGA Plena Inclusión Galicia, e promovidos nesta ocasión pola asociación local ASPAS, co apoio do Concello de Santiago de Compostela e da Deputación da Coruña.
Na presentación celebrada no Concello de Santiago participaron a concelleira de deportes, Pilar Lueiro; Juan Carlos Argüello, xefe de servizo de Programación Deportiva da Xunta; Javier Rico, delegado do reitor da USC para o deporte; Javier García Sánchez, representante de ASPAS; Eladio Fernández, presidente de Special Olympics Galicia; o preparador deportivo Abel Villar, e as deportistas Inés Gómez e Ramonita Feijóo.
“Santiago converterase máis unha vez na capital do deporte inclusivo”, destacou Pilar Lueiro, quen animou á cidadanía a asistir para apoiar unha iniciativa que ten como obxectivo principal integrar as persoas con discapacidade intelectual a través do deporte, fomentando a súa autoestima, superación persoal e inclusión social.
En total, participarán 194 deportistas de 13 entidades sociais de toda Galicia, acompañados por 41 adestradores e numerosos voluntarios. As actividades incluirán carreiras, salto de lonxitude, lanzamento de peso e marcha. Os xogos comezarán ás 10:45 coa inauguración e prolongaranse ata as 19:00 horas.
Special Olympics Galicia reafirma así o seu compromiso coa promoción do deporte como ferramenta esencial para a inclusión e visibilidade das persoas con discapacidade intelectual.