Deportes | Actualidade

Santiago será sede dos Xogos do Eixo Atlántico en xullo de 2026 tras recibir unha valoración moi positiva da súa candidatura. A cita deportiva reunirá cidades do norte de Portugal e Galicia.

O Concello de Santiago será a sede da XVI edición dos Xogos do Eixo Atlántico, que se celebrarán do 5 ao 10 de xullo de 2026. Así o anunciou a concelleira de Deportes, Pilar Lueiro, tras recibir Compostela o apoio unánime do Grupo Temático e unha valoración moi positiva da súa candidatura.

A alcaldesa, Goretti Sanmartín, deu a benvida aos representantes dos municipios participantes na reunión celebrada no Auditorio de Galicia e invitounos a descubrir a cidade. O encontro arrancou cun minuto de silencio polo falecemento da alcaldesa de Lugo, Paula Alvarellos.

Tamén se presentou a memoria dos XV Xogos celebrados en Vila Nova de Famalicão e Braga en 2024, que marcaron un récord de participación con 27 cidades e 2.378 persoas inscritas entre atletas, adestradores e delegacións.