Santiago presenta as marcas ‘Compostela é Memoria’ e ‘As mil marías’ para actividades de Memoria Histórica
A concelleira de Memoria Histórica de Santiago, Míriam Louzao, presentou este luns as novas marcas institucionais que identificaran os programas e actividades da área: Compostela é Memoria como marca xenérica e As mil marías para as iniciativas centradas na memoria das mulleres. O deseño correu a cargo de Thais Suárez, de Sísmica, e foi presentado coincidindo co mes de agosto, “un mes cun significado moi especial para a memoria histórica e colectiva de Compostela e do país”.
Louzao explicou que o obxectivo destas marcas é proxectar unha visión ampla da historia de loita pola xustiza social en Compostela, máis alá do golpe de 1936 e da represión, abarcando diferentes épocas e ámbitos. Pola súa parte, Thais Suárez indicou que o deseño de Compostela é Memoria se inspira na Estrela de Santiago de oito puntas, cunha fendedura que forma a letra “C” e simboliza a ruptura provocada polo silenciamento histórico.
En canto a As mil marías, a imaxe baséase en panos, elemento cotián asociado á vestimenta feminina e á iconografía de Maruxa e Coralia Fandiño, símbolos da loita contra a represión e do feminismo en Compostela, representando tamén a rede entre mulleres.
Durante a presentación, Louzao anunciou que o acto institucional en lembranza de Ánxel Casal terá lugar este ano nos soportais da casa consistorial debido ás obras no Pazo de Raxoi. Celebrarase ás 11:00 horas, coa participación das corporacións municipais de Teo e Arzúa, e de entidades e persoas implicadas na recuperación da memoria en Compostela.
A concelleira repasou tamén as accións realizadas desde a área, como a colocación dun panel no lugar do antigo cárcere franquista de Santa Isabel, as xornadas sobre o Padroado de protección á muller, a colaboración co proxecto da AC O Galo sobre a memoria histórica de Compostela, a conmemoración do décimo aniversario do pasamento da escritora Begoña Caamaño, as actividades polo centenario da visita de Ruth Matilda Anderson e o nomeamento dunha praza na zona histórica co nome da actriz Pilar Pereira.