Sergio Troitiño conquista o bronce no Open de Grecia e asegura os 20 puntos para o ranking olímpico
O taekwondista galego Sergio Troitiño (+87 kg, Mat’s) conseguiu a medalla de bronce no Open de Grecia (G-1), unha competición na que tamén participou a galega Carla Sesar (-57 kg, Natural Sport), que quedou ás portas dos cuartos de final.
Troitiño iniciou a súa participación no torneo cunha vitoria en tres asaltos fronte ao representante grego Petros Giannouchidis. Na semifinal tivo que enfrontarse ao coreano Woo Hyeok Park, campión do mundo en 2022 na categoría de -80 quilos. O galego volveu disputar un combate a tres asaltos, pero nesta ocasión a vitoria foi para o seu rival, o que lle permitiu subir ao terceiro chanzo do podio.
Máis alá do resultado deportivo, a medalla de bronce supón un importante éxito para Troitiño, xa que lle permite completar os 20 puntos máximos que podía sumar neste período mediante a participación en torneos G-1 e G-2. Esta puntuación resulta clave para o ranking olímpico dentro do ciclo de clasificación para os Xogos Olímpicos de Los Ángeles 2028.
Pola súa banda, Carla Sesar quedou ás portas dos cuartos de final. A deportista galega estivo exenta da primeira rolda e debutou directamente nos oitavos, onde se enfrontou á grega Athina Makrygianni. Sesar mantivo o combate aberto ata o último momento, pero acabou perdendo por un punto no último segundo, quedando así fóra da competición.