Silvia Longueira alerta da “situación límite” da dependencia e critica a aposta da Xunta polos bonos coidado
A deputada socialista Silvia Longueira advertiu esta mañá na Comisión 5ª do Parlamento de Galicia de que o sistema galego de dependencia atravesa “unha situación límite”, despois de confirmarse que Galicia é xa a cuarta comunidade con maiores retrasos na tramitación, cunha espera media de 349 días para resolver unha solicitude. Lonxe de mellorar, esta cifra aumentou respecto ao mes de xuño, o que, ao seu xuízo, confirma unha deriva crecente e preocupante.
Longueira criticou que, malia contar con máis recursos ca nunca, a Xunta “nunca os xestionou tan mal”. Acusou á Consellería de Política Social de operar sen planificación, sen coordinación e sen cumprir a obriga de contar cun Plan Estratéxico de Servizos Sociais. “É un modelo que leva 15 anos acumulando improvisación, colapsos e retrocesos en dereitos”, afirmou.
A parlamentaria sinalou como un dos efectos máis graves desta situación a derivación masiva de persoas dependentes aos hospitais, onde poden permanecer ata tres meses agardando unha praza residencial por falta de alternativas. “A Xunta está colapsando parte do sistema sanitario con ingresos sociais que non responden a criterios clínicos, senón á incapacidade da Consellería de ofrecer os recursos que marca a lei”, denunciou.
Longueira tamén cuestionou a decisión da Xunta de centralizar en Santiago o servizo de emerxencia da Dependencia, afastándoo da proximidade dos concellos. Segundo explicou, esta medida está provocando tempos de resposta máis longos e intervencións descoordinadas. “No canto de reforzar a atención no territorio, afastan o servizo das familias e converten unha emerxencia social nun trámite distante e lento”, apuntou.
A deputada denunciou ademais desprazamentos inxustificados de persoas maiores a prazas moi afastadas da súa contorna, mesmo cruzando concellos con recursos equivalentes. “É unha ruptura innecesaria coa súa rede, co seu entorno e coa súa vida cotiá”, advertiu.
Tamén puxo o foco na saturación do Servizo de Axuda no Fogar, que obriga a numerosos concellos a limitar a atención aos usuarios de grao III, deixando a persoas de grao I e II sen apoio. Esta situación está xerando tensións cos concellos, que están asumindo parte dos custos dun servizo que depende da Xunta.
Longueira criticou con dureza que, fronte a este panorama, o Goberno galego continúe apostando polos bonos coidado en lugar de reforzar os servizos públicos e as inspeccións. Ao seu xuízo, esta política “substitúe dereitos por parches e permite que a Administración eluda as súas obrigas”. Tamén cuestionou a proliferación de macroresidencias privadas como resposta improvisada á falta de prazas públicas.
A deputada concluíu reclamando medidas inmediatas e con prazos claros: “Que pensa facer a Consellería para reducir estes 349 días de espera e garantir que Galicia deixe de ser unha das comunidades máis atrasadas na tramitación da dependencia? As familias non poden seguir soportando un modelo que funciona tarde, funciona mal e funciona a golpe de improvisación”.