Sindicatos convocan unha folga indefinida na sanidade estatal dende o 27 de xaneiro
As organizacións sindicais CIG-Saúde, SATSE-FSES, FSS-CCOO, UGT e CSIF, con representación no Ámbito de Negociación, anunciaron este xoves a convocatoria dunha folga indefinida a nivel estatal na sanidade pública. A medida desenvolverase todos os martes a partir do 27 de xaneiro, en resposta ao rexeitamento do Ministerio de Sanidade a pactar un novo Estatuto Marco que avance nos dereitos do persoal estatutario.
Nunha rolda de prensa conxunta, os sindicatos denunciaron que o departamento que lidera Mónica García leva preto de tres anos dificultando e atrasando a negociación, ao “alimentar unha mesa paralela con organizacións alleas ao Ámbito de Negociación”. Segundo explican, a proposta ministerial non garante un marco común que beneficie todo o persoal, sen discriminación entre colectivos, nin reforza un sistema sanitario “máis sólido e preparado”.
Os paros afectarán todos os servizos sanitarios públicos, e chegan, segundo as organizacións, tras repetidos intentos de impulsar un texto que responda ás necesidades reais do sector. Critican tamén que non se atendera a manifestación de 10.000 profesionais celebrada en outubro fronte ao Ministerio, nin as propostas trasladadas nas dúas últimas reunións, que cualifican de “infrutuosas”.
As centrais sindicais acusan ao Goberno de seguir debilitando o sistema sanitario estatal, precarizando condicións laborais e ignorando déficits que quedaron en evidencia coa pandemia. Lembran que nos últimos catro anos a Comisión Galega de Control da Violencia tramitou 70 expedientes sancionadores, e denuncian que as administracións non están aplicando medidas suficientes para garantir estabilidade e seguridade no emprego público sanitario.
Entre os puntos considerados “irrenunciables” no Estatuto Marco figuran a revisión das retribucións básicas, acorde ao novo marco de clasificación profesional; o establecemento dunha xornada laboral digna, que permita conciliar vida persoal e laboral; e a posibilidade de xubilación anticipada e parcial voluntaria.
Segundo denuncian, o Ministerio desenténdese destas cuestións alegando que competen a outros departamentos –como Traballo, Función Pública, Seguridade Social ou Facenda–, algo que os sindicatos cualifican de “falta de vontade política”.
As organizacións convocantes fan un chamamento ao persoal sanitario a secundar a folga e participar nos actos de protesta que se convoquen baixo o lema “Un Estatuto Marco para avanzar”, insistindo en que a unidade sindical é clave fronte “á división que promove o Ministerio”.