Sinsal Primavera estrea en España as orixinais propostas musicais de Joseph Keckler, Chemtrails e Bombataz
O ciclo de concertos promovido por Sinsalaudio, co apoio do Concello de Vigo, regresa esta primavera cun cartel sen prexuízos de xéneros e cheo de propostas internacionais sorprendentes que se estrean por primeira vez en España. A cita terá lugar no MARCO o 15 de abril e na Sala Radar os días 30 de abril e 3 de maio.
O estadounidense Joseph Keckler abrirá o ciclo o martes 15 de abril no MARCO. A súa voz operística e escénica magnética, unida ao seu estilo provocador, promete unha experiencia inesquecible. Recoñecido por The New York Times como “un talento extraordinario que rompe as barreiras convencionais”, Keckler desafía etiquetas e expectativas.
O mércores 30 de abril será a quenda de Chemtrails, banda británica procedente de Manchester, coa súa mestura de post-garage-punk e power pop psicodélico. A súa música combina guitarras distorsionadas, sintetizadores primitivos e letras irónicas que prometen enerxía pura na Sala Radar.
Pecharán o Sinsal Primavera os belgas Bombataz o sábado 3 de maio. Presentarán o seu novo disco Baby Dry My Tears, un traballo que se move entre o jazz contemporáneo, o pop psicodélico e a experimentación electrónica. Unha proposta que rexeita os moldes convencionais para ofrecer un directo vibrante e orixinal.
O Sinsal Primavera é unha proposta cultural consolidada, que cada ano aposta pola calidade, a creatividade e a diversidade musical, e que transforma Vigo nun punto de encontro para propostas diferentes que non adoitan pasar polos circuítos máis comerciais.