SOS Sanidade Pública chama a mobilizarse o luns en defensa da atención primaria
A plataforma SOS Sanidade Pública convocou mobilizacións para o vindeiro luns 13 de abril diante de varios centros de saúde en toda Galicia co obxectivo de defender unha atención primaria de calidade.
As protestas, que coinciden co Día Internacional da Atención Primaria (12 de abril), buscan reclamar maior apoio político e recursos para este nivel asistencial, considerado fundamental dentro do sistema sanitario público.
Desde a plataforma denuncian que a atención primaria en Galicia sofre unha situación de saturación, falta de persoal e perda progresiva de calidade, especialmente no rural, onde moitos centros funcionan con limitacións ou permanecen pechados.
Advirten tamén de que a precariedade laboral está a provocar a saída de profesionais deste ámbito, mentres se recorre á contratación de persoal non especializado, o que consideran que pon en risco o modelo sanitario.
SOS Sanidade Pública reclama, entre outras medidas, incrementar o financiamento da atención primaria ata o 25% do orzamento sanitario, garantir unha mellor accesibilidade e continuidade asistencial, reforzar o persoal con oposicións anuais e reducir a burocracia.
Tamén solicitan impulsar políticas de saúde comunitaria, mellorar a formación e investigación e fomentar a participación cidadá a través de órganos como os consellos de saúde.
As concentracións desenvolveranse en distintas localidades galegas, entre elas A Coruña, Ferrol, Ribeira, Viveiro, Vigo, Cangas, Baiona, Gondomar, Marín ou Catoira, en diferentes horarios ao longo da xornada do luns. Ademais, en Portonovo a mobilización terá lugar o domingo 12 de abril.