Tom Jones suma o Coliseum á súa nova xira cun concerto o 2 de xullo
Tom Jones actuará no Coliseum o vindeiro 2 de xullo dentro da xira 'Come Gather Round', nun concerto incluído na programación coruñesa do Gozo Fest 2026 e organizado coa colaboración do Concello da Coruña e o apoio da Xunta de Galicia a través da Axencia Turismo de Galicia.
A cita suporá unha das tres únicas paradas do cantante en España e permitirá ao público coruñés escoitar en directo un repertorio marcado por clásicos como 'It’s Not Unusual' ou 'Green, Green Grass of Home', temas cos que o intérprete se consolidou como unha das grandes figuras da música internacional.
A alcaldesa, Inés Rey, subliñou que a chegada deste concerto reforza o papel da cidade como referencia da música ao vivo no noroeste. A presenza de Tom Jones encaixa ademais nun calendario especialmente intenso para o Coliseum, que suma xa 32 eventos musicais anunciados ao longo de 2026.
Cunha traxectoria de máis de seis décadas e máis de 100 millóns de discos vendidos, o artista galés mantense como unha figura vixente da industria musical. Aos 85 anos, continúa recibindo o recoñecemento da crítica polos seus traballos máis recentes, entre eles 'Surrounded By Time', 'Long Lost Suitcase', 'Spirit In The Room' e 'Praise & Blame'.