Tres videoxogos creados en Ferrol saltan ao escaparate internacional do SAGA Barcelona Game Fest
O talento desenvolvido no Campus Industrial de Ferrol terá estes días unha xanela internacional no sector dos videoxogos. Tres proxectos creados por alumnado do máster en Deseño, Desenvolvemento e Comercialización de Videoxogos da Escola Politécnica de Enxeñaría de Ferrol (EPEF) participan na primeira edición do SAGA Barcelona Game Fest, que se celebra do 9 ao 11 de outubro no recinto Fira de Barcelona Montjuïc.
Os xogos 'Purgatory Hoops', 'Néboa’s Hut' e 'Splash on Contact' poderán coñecerse no espazo da Universidade da Coruña (UDC), onde o público terá a oportunidade de ver os seus tráilers e probar as demos. Os tres proxectos foron desenvolvidos como Traballos Fin de Máster.
Unha partida de baloncesto no purgatorio
Un dos proxectos presentes en Barcelona é 'Purgatory Hoops', desenvolvido por Ecliptika Collective. Trátase dun shooter en primeira persoa no que unha pelota de baloncesto se converte na principal arma para enfrontarse a hordas de demos.
A misión consiste en avanzar polo purgatorio ata chegar ao diaño e derrotalo. O xogo combina combate, supervivencia por roldas e puntuación nunha arena cuxo aspecto cambia segundo o nivel.
O xogador conta con diferentes tipos de lanzamentos e movementos especiais e pode conseguir novos obxectos entre fases para mellorar as capacidades do personaxe.
O equipo está formado por Jacobo Lata Espiñeira, Hugo López Permuy, Irene Lorenzo Rodríguez, Jean Luis Manay Gutiérrez, Aarón Mera González, Brais Morgade Valcárcel e Manuel Otero Rivera, estudantes do Campus Industrial de Ferrol.
Maxia, remedios naturais e un segredo que agochar
A proposta de Conxuro Studio leva por título 'Néboa’s Hut' e aposta por unha experiencia narrativa. Neste caso, a persoa que xoga terá que preparar e vender remedios naturais sen permitir que os clientes descubran as súas capacidades máxicas.
A aventura articúlase arredor de tres espazos. No mostrador véndense os remedios, no caldeiro prepáranse e no xardín recóllense os ingredientes necesarios para elaboralos. O apartado visual combina elementos en 2D e 3D e utiliza unha cámara estática en cada escenario.
Neste proxecto participan Iago Fernández Garrido, Marcos Filgueiras Baamonde, Diego Cordero Contreras, Iván Ernesto Iglesias Pena e María Victoria Moreno González, alumnado da EPEF.
Unha misión na que non abonda con sobrevivir
O terceiro título, 'Splash on Contact', foi desenvolvido por True Encore e presenta unha aventura de acción con perspectiva isométrica.
A mecánica sitúa o protagonista ante a misión de protexer e acompañar a outro personaxe durante o percorrido por diferentes niveis. Os escenarios están formados por salas conectadas entre si e cada unha pode esconder emboscadas e ataques inimigos.
O reto, polo tanto, non consiste unicamente en avanzar, senón tamén en garantir a supervivencia do compañeiro de viaxe mentres se superan os diferentes obstáculos.
True Encore está integrado por Diego Tabas Costa, Ángel Quintero Montes, Liany Mederos Pérez, Sara Buedo Fernández e Álvaro García Peña, estudantes do Campus Industrial de Ferrol.
Unha nova gran cita para a industria do videoxogo
O SAGA Barcelona Game Fest estrea este ano un formato nacido da unión de diferentes eventos relacionados co sector, entre eles SAGA Salò del Gaming, Barcelona Game Fest e RetroBarcelona.
A cita reúne durante tres días máis de 200 videoxogos independentes e conta con máis de 500 puntos de xogo. O programa inclúe tamén unha zona dedicada aos clásicos, con máis de 150 máquinas recreativas, competicións de deportes electrónicos, propostas de realidade virtual, exposicións, conferencias e obradoiros.
O encontro incorpora ademais unha área profesional na que están previstas preto de 1.500 reunións de negocio, así como iniciativas orientadas a facilitar o contacto entre empresas e novos profesionais do sector.
Entre elas atópase o Talent Dev Day, pensado para conectar estudos e compañías da industria cos estudantes e coas persoas recentemente tituladas.
Para o alumnado da EPEF, a presenza destes tres proxectos permite levar fóra das aulas propostas desenvolvidas durante a súa formación e poñelas a proba ante público interesado nun dos grandes encontros dedicados ao videoxogo.