Trinta cantantes de 15 países competirán no VIII Concurso de Canto Compostela Lírica
O Concello de Santiago acolleu a presentación da final do VIII Concurso de Canto Compostela Lírica, un certame xa consolidado na cidade e organizado pola Asociación Amigos da Ópera. No acto participaron a concelleira de Capital Cultural, Míriam Louzao; o director xeral de Cultura da Xunta, Anxo Lorenzo; e o presidente de Amigos da Ópera, Jesús Couceiro.
Louzao destacou que o concurso é unha plataforma de visibilidade para o talento galego e unha aposta pola música, a mocidade e a proxección internacional: “O talento galego ten aquí a oportunidade de brilar”. Pola súa banda, Anxo Lorenzo puxo en valor o papel do certame como altofalante para as voces novas e como espazo de encontro entre artistas de distintas latitudes.
Nesta oitava edición competirán 30 cantantes de 15 países, seleccionados entre 80 persoas inscritas de 22 nacionalidades. Proceden de España, China, Cuba, Arxentina, Venezuela, Portugal, Suíza, Corea do Sur, Eslovaquia, República Checa, Suecia, Australia, Perú, Francia e Ucraína. A finalidade do concurso é apoiar carreiras emerxentes de artistas menores de 35 anos.
As actuacións terán lugar no Auditorio de Galicia o sábado ás 17:00 horas coa selección dos 10 finalistas; e o domingo ás 19:00 horas coa Gala Final con entrega de premios.
Os galardóns suman 7000 euros, ademais de recitais remunerados.
- 1º premio: 4000 euros, unha actuación coa Real Filharmonía de Galicia, un recital no Festival Les Musicales du Luberon (Francia) e un rol na temporada da Ópera de Oviedo.
- 2º premio: 2000 euros e un recital remunerado en Santiago.
- 3º premio: 1000 euros.
- Diploma Andrés Gaos: para a mellor voz galega, con actuación remunerada no Consello da Cultura Galega.
O panel está composto por profesionais de referencia: Patrick Canac, Elisabete Matos, Aquiles Machado, Maciej Pikulski, Victoria Stapells, Graziela Valceva Fierro, Celestino Varela e Arturo Reverter, que presidirá o xurado. Como secretario actuará José María Miranda Boto, sen voz nin voto.
Inclúense voces galegas como Susana García e Irene Zas, ademais de talentos internacionais como Emma Berggren (Suecia), Lada Bočková (Chequia), Sophie Burns (Australia), Nazar Mykulyak (Ucraína) ou Ting Yu (China).
O presidente de Amigos da Ópera destacou que o concurso está “plenamente consolidado no panorama lírico internacional”, con gañadores tan diversos como Milan Perišić (2024), Paulina Bielarczyk (2023), Carmen Buendía (2022), Natalia Labourdette (2021) ou Christian Gil-Borrelli (2020).