Actualidade

A Axencia contará cun espazo propio dentro do stand de Turespaña para chegar aos públicos profesionais visitantes deste evento. O mercado alemán, o terceiro emisor de turistas a Galicia, amosa unha demanda crecente pola cultura, paisaxe e enogastronomía galega.

Santiago de Compostela, 4 de marzo de 2025. Galicia afianza a súa estratexia turística de apertura a mercados internacionais coa presenza, un ano máis, na feira Internationale Tourismus-Börse (ITB) Berlín 2025. Este evento, centrado en públicos profesionais, desenvolverase entre o 4 e o 6 de marzo no recinto feiral Messe Berlín.

A participación galega chega da man de Turismo de Galicia, que contará cun espazo singular de 50 m² dentro do stand de Turespaña, situado no Pavillón 2.1. Esta área disporá de mostradores de información para os visitantes e dunha zona de encontros profesionais para o sector turístico. Ademais, contará coa representación do Clúster Turismo de Galicia, que organiza para esta edición unha misión comercial coa participación de polo menos doce empresas, entre elas axencias de viaxes, aloxamentos e experiencias turísticas na comunidade.

Para Turismo de Galicia, a presenza na ITB confirma a aposta pola internacionalización dentro da súa estratexia rectora. O mercado alemán é o terceiro emisor de visitantes a Galicia, só por detrás de Portugal e Estados Unidos. Segundo os datos dispoñibles, un 2,4% dos turistas que viaxan por Galicia pertencen a este mercado.

En 2024, o número de pernoitas de visitantes alemáns en Galicia medrou nun 7%, o que reflicte un interese crecente pola cultura e a paisaxe galega, así como pola combinación de ocio e enogastronomía. Outros aspectos altamente valorados por este público son a amabilidade da poboación local e a excelente relación calidade-prezo.

A ITB Berlín celébrase desde 1966 e está considerada a principal plataforma global do sector turístico para profesionais. Na edición de 2024 contou con 5.500 expositores de máis de 165 países e recibiu 100.000 visitantes. Alén do público alemán, a ITB constitúe un escaparate estratéxico para operadores doutros mercados, xa que o 50% dos asistentes proceden doutros países europeos e de destinos como Estados Unidos, Canadá, India, Xapón ou China.