Un colar de posible orixe grega e unha vasilla castrexa destacan na nova campaña arqueolóxica do Castro de Esmelle
A cuarta campaña arqueolóxica no Castro de Esmelle, tamén coñecido como Tralocastro, continúa achegando novos datos sobre o pasado castrexo da comarca. Entre os achados máis destacados figura unha pequena peza dun colar de vidro bañado en ouro que, segundo as primeiras investigacións, podería ter a súa orixe na illa grega de Rodas, un descubrimento que evidencia as posibles relacións comerciais das comunidades castrexas con outros territorios do Mediterráneo.
Xunto a esta peza apareceu tamén unha vasilla decorada con motivos sogueados, da que se recuperaron varios fragmentos. Este tipo de decoración é unha das máis características da cultura castrexa e constitúe outro dos elementos de maior interese desta campaña.
Os traballos están dirixidos polo profesor da Universidade da Coruña Juan Luis Montero Fenollós, como director científico, e polo investigador do CSIC Samuel Nión Álvarez, como director técnico. Na escavación participan preto de vinte persoas, entre alumnado universitario, persoal investigador e titulados recentes vinculados á Universidade da Coruña, á Universidade de Santiago de Compostela e á Universidade Complutense de Madrid.
A campaña, iniciada o pasado 13 de xullo, continúa ampliando o coñecemento deste asentamento da Idade do Ferro, que ocupa unha superficie estimada de 20.000 metros cadrados e conta con tres aneis defensivos. Nesta edición abríronse tres novos sectores de intervención, centrados no acceso ao castro, na contorna dun edificio colectivo e na croa do xacemento, onde continúan aparecendo estruturas e materiais de gran interese científico.
Durante unha visita institucional celebrada este mércores, a vicerreitora do Campus de Ferrol e Responsabilidade Social, Ana Ares, destacou o valor formativo do proxecto para o estudantado, mentres que o alcalde de Ferrol, José Manuel Rey Varela, subliñou que o Castro de Esmelle se está a consolidar como un referente da investigación arqueolóxica en Galicia e como un recurso para impulsar o turismo cultural.
Os traballos continuarán durante o mes de agosto con actuacións de restauración, consolidación e documentación do xacemento, ademais da elaboración dun plano topográfico de alta precisión. Paralelamente, o programa divulgativo 'Aberto por Escavación' seguirá ofrecendo visitas guiadas gratuítas para achegar á cidadanía os avances das investigacións.