O alumeado público de Lugo recupera o funcionamento de 350 dos 365 cadros eléctricos
A treboada rexistrada na madrugada do domingo ao luns continúa deixando consecuencias en diferentes puntos de Lugo, especialmente na zona sur da cidade. Veciños de Fingoi e San Fiz trasladaron a súa situación, xa que varias rúas continúan sen alumeado público operativo.
O alumeado público de Lugo conta con 17.000 puntos de luz, que funcionan a través de 365 cadros eléctricos distribuídos pola cidade. Durante a noite do luns ao martes, os equipos municipais traballaron no restablecemento do servizo e conseguiron rearmar 211 cadros eléctricos que quedaran afectados. Con estas actuacións, son xa 350 dos 365 cadros os que se atopan actualmente en funcionamento. Isto significa que permanecen 15 cadros eléctricos con danos graves, que deberán ser reparados para poder recuperar completamente o funcionamento do alumeado público.
Os traballos realizados durante a pasada noite permitiron recuperar o servizo en 9.500 puntos de luz. A estes súmanse os puntos correspondentes aos cadros que non resultaran danados pola treboada e que xa permanecían operativos. Deste xeito, o alumeado público continúa recuperándose de maneira progresiva, á espera de que se reparen os últimos 15 cadros afectados e poidan volver funcionar os 17.000 puntos de luz da cidade.
Os danos afectaron tamén á rede semafórica. Durante o luns 24 de agosto, os servizos municipais traballaron en diferentes puntos nos que os semáforos quedaron afectados, entre eles San Roque, Ronda das Mercedes, Ronda da Muralla, avenida das Américas, Augas Férreas, Ramón Ferreiro, Ronda de Fingoi, Adolfo Suárez e avenida da Coruña.
No caso do alumeado público, tamén se detectaron incidencias en lugares como Fonte dos Ranchos e Castelo de Arriba. Os equipos eléctricos continúan cos traballos para recuperar de maneira progresiva o funcionamento dos servizos afectados.
Desde o Goberno local sinalan que os danos ocasionados pola tormenta son dos máis importantes dos últimos tempos e que os traballos continuarán para retirar elementos que poidan representar un risco e avanzar no restablecemento dos servizos públicos.
A intensidade do temporal tamén provocou incidencias na subministración eléctrica. En Galicia contabilizáronse máis de 2.000 raios en 24 horas, mentres que 934 clientes dunha compañía eléctrica quedaron sen subministración como consecuencia da tormenta.
Á caída de árbores e pólas sumáronse tamén postes, cables e outros elementos que acabaron sobre a calzada, obrigando a mobilizar desde a madrugada aos Bombeiros, Policía Local e servizos eléctricos municipais.
Entre as actuacións realizadas figura a retirada ou aseguramento de árbores danadas ou caídas en puntos como a Ronda de Fingoi, Seoane e San Xoán do Campo, San Xulián de Bocamaos, a estrada vella de Santiago, O Burgo, Bagueixos, Calde e Adai, ademais doutras zonas da cidade e do municipio.
Os equipos municipais continúan así traballando para recuperar os servizos afectados e eliminar os elementos derivados do temporal que poidan supoñer un perigo para a veciñanza.