Vigo amplía o orzamento en 72 millóns para vivenda, obras e melloras na cidade
O Pleno do Concello de Vigo aprobou este luns, con 18 votos a favor do grupo socialista, 4 abstencións do PP e 3 votos en contra do BNG, a ampliación do orzamento municipal en 72 millóns de euros con cargo aos remanentes. Estes fondos destinaranse a políticas de vivenda, obras en colexios, melloras en instalacións deportivas e proxectos de humanización, entre outras actuacións.
O concelleiro de Facenda, Jaime Aneiros, destacou que “Vigo é o único concello de Galicia con solvencia e capacidade para achegar recursos adicionais e extraordinarios”, subliñando que a ampliación permitirá “transformar toda a cidade” e mellorar a calidade de vida da veciñanza.
Entre os investimentos destacan 8 millóns para políticas de vivenda, coa creación dunha empresa pública, axudas de alugueiro a través do programa Vigo Aluga e apoio á compra de pisos; 3,9 millóns para melloras en colexios; 15 millóns para infraestruturas deportivas; 26,5 millóns para obras de humanización en 350 rúas; e 10 millóns para renovación de firmes. Tamén se acometerán melloras en instalacións municipais como o edificio do Concello, a Casa da Xuventude, o mercado de Teis e os baixos do Auditorio Mar de Vigo.
O voceiro socialista, Carlos López Font, salientou que esta ampliación é un reflexo da forma de gobernar de Abel Caballero, “escoitando á cidadanía e atendendo as súas prioridades”. Lembrou que, desde 2007, Vigo viviu unha profunda transformación con obras de humanización en 1.250 rúas, a remodelación da Porta do Sol, a construción do HALO, o aparcamento gratuíto no Álvaro Cunqueiro, a renovación de Balaídos, a creación de 9 escolas infantís, melloras en colexios, 1.000 bolsas anuais de inglés, novos parques e políticas sociais e turísticas recoñecidas a nivel estatal e internacional.