Vigo destina 1,3 millóns ao Marisquiño, que volverá a Samil do 6 ao 9 de agosto
O Concello de Vigo destinará máis de 1,3 millóns de euros á celebración do festival O Marisquiño, que terá lugar do 6 ao 9 de agosto na praia de Samil.
O alcalde, Abel Caballero, asinou este martes o convenio de financiamento xunto co fundador do evento, Carlos Domínguez “Pity”, por un importe total de 1.342.000 euros. Segundo destacou o rexedor, esta edición será “o mellor Marisquiño que se tivo nunca”, financiado na súa totalidade polo Concello.
O festival de cultura e deportes urbanos reunirá a arredor de 1.500 deportistas procedentes de máis de 30 países, así como a uns 60 artistas. A programación deportiva contará con oito disciplinas: skate, BMX, breaking, basket 3x3, flatland, Big Air, FMX e MTB, consolidando o evento como unha referencia internacional.
Ademais, O Marisquiño manterá o seu carácter inclusivo, con probas adaptadas de skate e BMX para persoas con discapacidade. A programación cultural incluirá concertos, sesións de DJ, arte urbana e batallas de freestyle.
Todas as actividades serán de acceso gratuíto grazas ao financiamento municipal. Neste sentido, Caballero criticou que nin a Xunta de Galicia nin a Deputación de Pontevedra participen economicamente no evento.