Vigo, escenario da celebración do Día das Forzas Armadas 2026
A cidade de Vigo foi seleccionada para acoller o Día das Forzas Armadas 2026, que se celebrará o sábado 30 de maio, segundo confirmou oficialmente o Xefe de Estado Maior da Defensa, Teodoro López Calderón, nunha carta remitida ao Concello.
O alcalde, Abel Caballero, informou este martes da comunicación oficial e da conversa mantida coa ministra de Defensa, Margarita Robles, na que lle trasladou a elección da cidade como sede dos actos principais da efeméride.
As Súas Maxestades os Reis de España presiden cada ano a conmemoración do Día das Forzas Armadas, que inclúe un desfile militar, así como outras actividades previas: exposicións de material, concertos de música militar e exhibicións de persoal e equipamento.
Caballero expresou a súa satisfacción pola elección de Vigo, subliñando que a cidade “ten unha enorme tradición de apoio e querenza polas Forzas Armadas” e que esta celebración será unha oportunidade para “volver amosar o noso recoñecemento e apoio” ás institucións militares e á súa labor.
A celebración converterá Vigo no epicentro nacional dos actos conmemorativos de 2026, que cada ano se desenvolven nunha cidade diferente de España, combinando homenaxes institucionais, actividades divulgativas e exhibicións abertas ao público.