Vigo impulsa o Vigo Vertical e Balaídos con obras por 37,8 millóns
O Concello de Vigo avanza simultaneamente nas obras do Vigo Vertical e na reforma do Estadio de Balaídos, cun investimento global de 37,8 millóns de euros. Así o destacou este martes o alcalde, Abel Caballero, quen subliñou que “nestes momentos temos en marcha, só en Balaídos e no Vigo Vertical, obras por 37,8 millóns de euros”.
No ámbito da mobilidade urbana, Caballero anunciou que a próxima semana se instalarán as catro ramplas mecánicas da rúa Pintor Colmeiro, cun orzamento de 2,5 millóns de euros. O rexedor lembrou que en outubro de 2025 xa se puxeron en funcionamento as dúas ramplas de Pintor Lugrís, cun investimento de 1,6 millóns.
Entre os proxectos que presentan avances significativos atópase tamén a humanización do Paseo de Granada, que inclúe a instalación de catro ramplas mecánicas por un importe de 3,3 millóns de euros. A estas actuacións súmase a obra da rúa Serafín Avendaño, onde se constrúe unha rampla na contorna do HALO, cun custo de 1,7 millóns.
O alcalde destacou ademais a próxima inauguración do ascensor entre Romil e Hispanidade, cun investimento de 1,5 millóns de euros, que completará o corredor de mobilidade que parte do Auditorio Mar de Vigo. A este proxecto engádese a construción doutro ascensor entre Marqués de Valterra e Torrecedeira, tamén cun orzamento de 1,5 millóns.
No plano deportivo, Caballero puxo o acento no avance da reforma da Grada de Gol de Balaídos, unha actuación de 26 millóns de euros que permitirá que o estadio “estea listo para ser sede do Mundial de 2030”.
Segundo explicou o rexedor, o Concello está a piques de finalizar obras do programa Vigo Vertical por valor de 11,5 millóns de euros. Ademais, atópanse en fase final outros proxectos municipais como a remodelación da primeira planta da Casa das Artes e a intervención no muro de Navia, onde se creará unha nova bancada.