Actualidade

O alcalde Abel Caballero asistiu ao inicio da instalación da caixa xigante de regalo, de 17 metros de alto e 79.000 luces led, que dará comezo a un Nadal con novas imaxes, máis espazos e máis de 11,5 millóns de luces en toda a cidade.

Vigo xa iniciou a montaxe dos grandes elementos luminosos que marcarán o Nadal 2025. O alcalde, Abel Caballero, asistiu este martes á instalación da caixa xigante de regalo, unha estrutura de 17 metros de alto, 9 de ancho e 15 de profundidade que integra 79.000 luces led de cores.

Segundo explicou, o sistema lumínico permitirá crear combinacións e imaxes novas, converténdose nun dos principais atractivos da cidade. O rexedor avanzou que o seguinte elemento en instalar será un boneco de neve de grandes dimensións.

En total, Vigo contará con máis de 11,5 millóns de luces led repartidas en 420 rúas e prazas. A iluminación inclúe 1.161 arcos ornamentais, 2.883 motivos decorativos, 2.667 árbores iluminadas, a tradicional árbore xigante con espectáculo de luz e son en Porta do Sol e o bosque de Nadal.

Tamén se instalarán 50 elementos lumínicos 3D duns 3 metros de altura, o Belén Monumental da Casa das Artes, a Casa de Papá Noel e o Carteiro Real, ademais de iluminación en mercados, prazas, rotondas, pérgolas e edificios municipais.

Caballero destacou que este ano haberá 13 conxuntos decorativos en diferentes rúas, 6 instalacións transitables de gran porte e 12 instalacións non transitables en zonas como Príncipe, Policarpo Sanz, Vía Norte, Urzáiz ou García Barbón.

O alcalde salientou a importancia do Nadal como motor económico e turístico, anunciando actividades de dinamización en todas as áreas comerciais e a licitación dos mercados de Nadal no Calvario e Bouzas. Tamén confirmou que se abrirá unha nova área dedicada ás festas, aínda que non revelou detalles, que dará continuidade á expansión do pasado ano no Paseo de Alfonso XII.