Vigo inicia a redacción do proxecto do Indoor Park de Navia
A Xunta de Goberno Local aprobará a contratación da redacción do proxecto de execución do Indoor Park Navia cun orzamento de 89.849,76 euros. O alcalde, Abel Caballero, explicou que o obxectivo é crear un espazo cuberto para a práctica de deportes urbanos, con pistas para modalidades como skate, BMX, scooter e roller, entre outras.
O recinto contará con dous espazos diferenciados: unha zona street, con elementos baixos e obstáculos que simulan unha rúa, adaptados a diferentes alturas e practicables para todas as disciplinas, e unha zona park, con ramplas e quarters de entre 1,6 e 4 metros de altura. Ademais, incluirá unha zona segura con foam pit (piscina de escumas) e resi (salto con recepción branda).
As instalacións disporán dun edificio anexo con vestiarios, aseos, oficinas, almacén, cantina e unha zona para espectadores. Situarase entre as rúas Teixugueiras e Ufas e completaranse con equipamentos exteriores, urbanización xeral das parcelas, senda peonil, carril bici, zonas verdes e espazos de recreo.
Caballero tamén lembrou que hoxe arrinca a 25ª edición de O Marisquiño en Samil, que se celebrará do 7 ao 10 de agosto cunha achega municipal de 1.342.000 euros. Nesta primeira xornada haberá talleres infantís, adestramentos e programación musical, e recomendou o uso do transporte urbano reforzado para asistir ao evento.