VigoCultura regresará o 30 de xaneiro con 27 novos espectáculos
VigoCultura regresará o vindeiro 30 de xaneiro cunha programación para o primeiro semestre do ano que inclúe un total de 27 espectáculos de distintas disciplinas artísticas. Así o anunciou o alcalde de Vigo, Abel Caballero, que destacou o carácter diverso e consolidado dunha iniciativa que volverá encher o Auditorio Municipal.
A programación inclúe dous espectáculos de rúa, 16 propostas dirixidas ao público adulto e nove destinadas ao público infantil e familiar. O cartel abrangue disciplinas como a comedia, os monólogos, o teatro clásico e contemporáneo, a danza, o circo e a maxia.
Como é habitual, VigoCultura arrancará con dous grandes espectáculos de rúa. O primeiro terá lugar o venres 30 de xaneiro ás 19.00 horas na Porta do Sol, coa proposta CARMAN, un espectáculo sorprendente no que un Seat 600 cobra vida e remata circulando sen condutor ao ritmo da música e do circo.
O sábado 31 de xaneiro, tamén ás 19.00 horas, celebrarase o pasarrúas O mundo do circo, con saída desde o MARCO. Un circo ambulante percorrerá a rúa Príncipe interactuando co público a través da música, o humor e a diversión.
A partir desa fin de semana, a programación trasladarase ao Auditorio Municipal. O 1 de febreiro abrirase a tempada coa obra Los Yugoslavos, cun elenco encabezado por Javier Gutiérrez. Entre as novidades, destacan dúas estreas: Brazaletes, de Amorodio Teatro, e Señores que din, de Ste Xeito Produccións.
Ademais, varias das propostas estarán vinculadas a datas sinaladas do calendario, como o Día Internacional da Muller, o Día Mundial do Circo ou o Día Internacional da Danza. VigoCultura contará tamén cunha proposta internacional coa comedia Rei Lear, unha adaptación da traxedia de Shakespeare a cargo da Companhia do Chapitó, procedente de Portugal.
“VigoCultura é un éxito excepcional, practicamente cheo todos os días no Auditorio Municipal”, concluíu Abel Caballero.