Viveiro estrea a Milla Internacional do Cantábrico para converterse nun referente do atletismo urbano
Viveiro incorporará este outono unha nova cita ao seu calendario deportivo coa primeira edición da Milla Internacional do Cantábrico (MIC), un evento que se celebrará os días 17 e 18 de outubro e que nace coa intención de situar á cidade entre os grandes escenarios do atletismo urbano. A iniciativa está promovida polo Concello de Viveiro en colaboración co CD CAMOVI e combinará competición, lecer e promoción turística nunha fin de semana pensada para atraer tanto a deportistas como a visitantes.
A presentación oficial da proba serviu tamén para render homenaxe ao atleta olímpico viveirense Adrián Ben, que exercerá como embaixador desta primeira edición e contribuirá a dar visibilidade a unha cita que aspira a consolidarse dentro do calendario nacional.
A programación reunirase baixo o lema "Tres eventos. Un mesmo escenario. Unha gran cita co atletismo" e incluirá a celebración da Milla Internacional do Cantábrico, a carreira 10K Cidade de Viveiro e a MIC Kids, destinada aos máis pequenos. Ademais das probas deportivas, a organización prepara un completo programa de actividades paralelas con música en directo, encontros con atletas, sesións de sinatura de autógrafos, sorteos e unha ampla zona de meta deseñada para o desfrute de corredores, familias e público.
A alcaldesa de Viveiro, Mariña Gueimunde, destacou durante a presentación que a nova competición supón unha oportunidade para reforzar a proxección do municipio máis aló da tempada estival. Segundo indicou, a iniciativa permitirá atraer visitantes, favorecer a actividade económica local e fomentar hábitos saudables e a participación cidadá, ao tempo que consolida a imaxe de Viveiro como sede de eventos deportivos de calidade.
A rexedora tamén agradeceu o traballo desenvolvido polo CD CAMOVI, así como a implicación das entidades colaboradoras, empresas e persoas voluntarias que participan na organización dun proxecto que nace coa intención de medrar e converterse nunha referencia para o atletismo español.
Pola súa banda, Adrián Ben amosou o seu orgullo por formar parte da iniciativa desde os seus primeiros pasos e destacou que unha competición destas características permitirá achegar o atletismo de alto nivel á comarca, ademais de servir de inspiración para as novas xeracións de deportistas.
Desde a organización explicaron que a MIC constitúe unha marca propia creada para promocionar Viveiro dentro e fóra de Galicia a través da combinación de deporte, turismo e promoción do territorio. O obxectivo é reunir atletas nacionais e internacionais, corredores populares e centos de nenos e nenas nunha fin de semana chamada a converter a cidade na capital do atletismo urbano do norte peninsular.
As inscricións abriranse este venres 31 de xullo ás 21.00 horas a través das páxinas mic.gal e ccnorte.com. Ademais, a web oficial da proba ofrecerá toda a información actualizada sobre percorridos, regulamentos, programación e novidades desta primeira edición.