WORK ON SUNDAY presenta Amplificando a memoria, un proxecto singular para preservar o patrimonio sonoro galego
A produtora compostelá WORK ON SUNDAY, organizadora do WOS Festival, presentará do 11 ao 14 de setembro na Sede Afundación de Santiago de Compostela o proxecto Amplificando a memoria, unha proposta multidisciplinar que combina arte, tecnoloxía, educación, reflexión social e participación cidadá.
O proxecto xorde arredor do Organsound, un altofalante galego deseñado en 1972 polos irmáns composteláns Portela Seijo, inspirado nos órganos de tubos e hoxe case esquecido. Segundo explica a directora da iniciativa, Acacia Ojea, trátase de “recuperar un obxecto tecnolóxico singular e facelo audible, converténdoo en símbolo dun xeito de escoitar máis consciente, conectado co corpo, co espazo e co tempo”.
A programación inclúe unha instalación sonora elaborada polo artista multidisciplinar Xoán-Xil López, un panel de pensamento para contextualizar o papel do Organsound na innovación acústica, e unha serie de sesións de escoita colectiva comisariadas por selectores locais e internacionais.
Amplificando a memoria conta co apoio da Deputación da Coruña, o Concello de Santiago, a Universidade de Santiago de Compostela e Afundación, e enmárcase no compromiso de preservar e actualizar o patrimonio sonoro galego, creando pontes entre xeracións e activando a escoita crítica e compartida.