Cultura

O escritor compostelán obtén unha residencia dun mes na Toscana e 3.000 € para desenvolver a súa proposta de novela, elixida por un xurado expertísimo na cuarta edición do galardón.

A Concellaría de Capital Cultural do Concello de Santiago e a Residencia Literaria 1863 anunciaron hoxe a concesión do Premio Exería 2025 ao proxecto de creación literaria de Xosé Antonio Neira Cruz, que recibirá unha axuda de 3.000 € e pasará un mes na Residencia La Baldi (Montegiovi, Toscana) para concentrarse na súa novela.

O xurado, integrado por Berta Dávila Fernández, Agustín Agra Barreiro e Gemma Sesar Ignacio, valorou “a solvencia narrativa, o rigor e a coherencia do proxecto, así como a vinculación da temática coa contorna da residencia e coa cidade de Santiago”. A selección deste compostelán, xornalista e profesor da USC, pecha a cuarta edición dun premio que busca apoiar a creación literaria galega en contornas inspiradoras.

En palabras de Neira Cruz, “é un luxo poder dedicar un mes intensivo á novela nun espazo tan cargado de historia e beleza como Montegiovi”. O seu extenso curriculum suma máis de trinta títulos e numerosos galardóns, entre eles o Barco de Vapor, o Repsol de Novela e os White Ravens internacionais.