Xove converteuse no centro da entrega das Bandeiras Azuis de Galicia 2026
A Praia de Esteiro foi escenario da entrega oficial das Bandeiras Azuis de Galicia 2026, unha cita que reuniu en Xove a representantes institucionais de toda a comunidade para celebrar os distintivos que recoñecen a excelencia ambiental, a seguridade e a calidade dos servizos en praias, sendeiros e instalacións náuticas.
O acto contou coa presenza do presidente da Xunta de Galicia, Alfonso Rueda; da conselleira de Medio Ambiente, Ángeles Vázquez; do delegado territorial da Xunta en Lugo, Alfonso Villares; e do alcalde de Xove, Demetrio Salgueiro. Tamén participaron alcaldes, concelleiros e representantes dos municipios galegos que este ano recibiron algunha destas distincións.
Un dos momentos máis destacados da xornada foi o izado da Bandeira Azul da Praia de Esteiro, un símbolo que acredita o cumprimento de criterios relacionados coa protección do medio ambiente, a accesibilidade, a seguridade e a prestación de servizos aos usuarios. O acto foi protagonizado por Alfonso Rueda e Demetrio Salgueiro, acompañados por membros do goberno local.
A celebración serviu ademais para poñer en valor o traballo desenvolvido ao longo do ano para manter este espazo costeiro nas mellores condicións. Desde o Concello destacouse o labor realizado polo persoal municipal, responsable de numerosas tarefas de mantemento, acondicionamento e preparación do areal para unha cita de especial relevancia para o municipio.
Durante a xornada tamén se recoñeceu a colaboración de entidades e profesionais vinculados á actividade turística e deportiva da zona. Entre eles figurou Nacho Fernández, xerente da escola Esteiro Surfing e do establecemento Surf Café, pola súa implicación na organización e desenvolvemento do evento.
O bo tempo acompañou unha convocatoria marcada pola convivencia entre representantes de distintos concellos galegos e polo intercambio de experiencias arredor da conservación dos espazos naturais. A entrega das Bandeiras Azuis converteuse así nun escaparate para destacar a importancia de preservar o litoral e promover modelos de xestión sostibles que contribúan á protección do patrimonio ambiental galego.