Os traballos de roza e limpeza de estradas autonómicas que a Xunta está a levar a cabo nas últimas semanas nas catro provincias, chegan estes días á contorna de Samos. En concreto, ao longo desta semana actuarase na estrada LU-633 que une Pedrafita do Cebreiro e Sarria.
As tarefas que se veñen realizando céntranse na retirada de especies pirófilas, aquelas que son máis propensas á propagación do lume, coa fin de previr incendios forestais.
Tamén se acometen rozas para completar o traballo ordinario de conservación das estradas autonómicas e reducir progresivamente o uso de herbicidas.
Tramo da estrada LU-633
De igual xeito, realízase o acondicionamento das posibles zonas verdes e das sendas peonís, para que estean en condicións axeitadas.
As intervencións teñen como obxectivos potenciar o efecto cortalumes das estradas, aumentar a seguridade viaria, favorecendo unha maior visibilidade, e fomentar unha mobilidade máis segura e sustentable mediante as sendas e zonas verdes para o tránsito peonil.
