Os traballadores de Vestas informaron na mañá de hoxe de que onte fixeron unha votación igual que os compañeiros de Alcoa no que de forma asemblearia e libre votaron o fin da loita, é dicir, asinaron un acordo para o seu despedimento.
“Hoxe é un día triste para a Mariña. Por unha banda Alcoa apaga as cubas despois dunha loita digna e moi moi longa. Polo outro, Vestas tamén viviu a súa propia xornada triste, curiosamente acabamos cunha votación igual que os compañeiros de Alcoa. Hoxe votamos de forma asemblearia e libre o fin da loita”, comezou dicindo David Mariño, presidente do comité de empresa da empresa viveirense.
“O motivo é mais que obvio e moitos especulan e confabulan con dignas intrigas de películas de espías. O apoio á nosa causa é nulo a nivel institucional, desde a Xunta ata o Goberno de España apenas nos brindaron máis que unha palmadita nas costas”, di David Mariño.
“Loitamos dignamente co obxectivo de atopar un comprador para Vestas Viveiro e devolver algo de traballo á Mariña pero nada… O certo é que as últimas mesas industriais mostráronnos claramente a apatía e falta de compromiso das administracións na procura de solucións e o pouco atractivo que resulta a reindustrialización da Mariña Lucense”, engade o voceiro,”a nosa loita acaba porque naceu morta e isto non é culpa dos traballadores de Vestas Viveiro, é culpa dunha lexislación laboral absurdamente inxusta, que como xa vimos nas últimas noticias, apenas se disfrazou un pouco para seguir en vixencia”.
“Visto o deprimente panorama e o pouco probable que sería gañar a nulidade xudicial do ERE, e mesmo gañandoa, no mellor dos casos conduciríanos a outro ERE en poucos días, por iso optamos por buscar unha conciliación previa ao xuízo”, engadiu ao seu comunicado.
“Nun tempo moi curto, apenas dous días, presentouse e aceptadouse unha conciliación económica para todos os traballadores de Vestas así como opcións de xubilación para maiores de 55 anos e unhas recolocacións no centro de Viveiro que aínda estaban sen cubrir, lembremos que Vestas ofertaba 24 prazas”, dixo o presidente do comité de empresa, e engadiu “queremos agradecer o apoio mostrado a veciñanza, amigos e familiares que tanto nos apoiaron”.
