A parroquia de Amarante en Antas de Ulla foi o lugar elixido polo grupo Zoelas para a gravación do seu videoclip ‘O lenzo’. Nel, pódense ver diferentes instrumentos como a zanfona que lle da un son característico e acompaña as voces da agrupación.
Esta canción une a música tradicional con outros estilos creando un son característico e único. No videoclip, os corpos son os lenzos onde crear e vivir. O tema pertence ao seu novo álbum Evelaités.
ZOELAS
Zoelas é un grupo musical de recente creación que nace na Comarca da Ulloa. O xermolo do colectivo sitúase na Asociación Fiadeira, da que forman parte as integrantes de Zoelas. O nome é collido daquela tribu prerromana que habitaba a zona noroeste da península. Un matriarcado cuxos valores serven ao grupo de inspiración para moitas das súas composicións.
Partindo do seu contacto coa música tradicional, Bea García, Érica García, Carmela Mariño, Pilar Naveira, María Bouzas e Patricia Coucheiro deciden xuntar inquedanzas musicais para dar lugar a Zoelas, proxecto no que misturan as raíces do canto tradicional con melodías doutros estilos musicais e letras propias convivindo con coplas recollidas.
As voces femininas están ben acompañadas por Bruno Villamor á requinta, gaita e zanfona; Miguel Varela á percusión e Michel Rivadulla á guitarra e ao acordeón
