Hoxe, luns, 31 de xaneiro abren as inscricións para anotarse as actividades de Ximnasia de Mantemento, Aerobic, Pilates e Ioga no Concello de Pantón.
Para elaborar a lista de admitidos darase prioridade e terán preferencia aqueles veciños e veciñas que estean censados no municipio.
Para realizar a inscrición poderase achegar á casa da cultura o chamar ao teléfono 982 456 377. As prazas cubriranse por orde de inscrición tendo en conta a condición xa mencionada.
A realización de exercicio é fundamental para manter unhas condicións de vida saudable, por iso, dende o Concello de Pantón ofrecen catro disciplinas diferentes enfocadas a diferentes obxectivos e capacidades. Unha ampla proposta de actividades entre as que se encontra a ximnasia de mantemento, unha actividade que se centra en realizar un mínimo de exercicio para que a persoa se manteña saudable xa que, o sedentarismo, pode causar problemas de saúde como enfermidades cardiovasculares, osteoarticulares ou metabólicos.
Por outra banda, se o obxectivo é a queima de graxas, os veciños poderán escoller o aerobic que son exercicios de intensidade media para traballar a capacidade torácica mediante sesións grupais nos que se está en continuo movemento. Favorece a queima de graxas, a mellora da condición física, a función cardiovascular e a capacidade pulmonar.
Por outra banda se o que se quere é conectar corpo e mente, ofrécense dúas disciplinas, o pilates e o ioga. O pilates é un conxunto de exercicios físicos nos que se adestra a musculatura, a resistencia a flexibilidade e o control da respiración e da mente. A súa práctica mellora e corrixe a postura corporal, axuda a gañar movemento. Mentres que o ioga é unha disciplina que conecta corpo, respiración e mente. Utiliza posturas físicas, exercicios de respiración e meditación para unha mellora na saúde xeral.
