Ricardo Fernández, un emprendedor mindoniense, ofrecerá unha charla este sábado día 12 ás 20.00 horas no auditorio municipal de Mondoñedo “coa idea de explicar a concepción integral da saúde, a importancia dos hábitos saudables no mantemento da mesma e como encaixa este novo proxecto nesta perspectiva da saúde”, explica o promotor.
Ricardo argumenta que “a única vía para mellorar a calidade de vida en relación á saúde é coa adquisición de mellores hábitos, e con esta idea elaborou un programa de 10 semanas de duración, titulado: hábitos saudables e autogestión de saúde, cuxas características máis representativas son: unha planificación coherente coas túas características e circunstancias, un acompañamento continuado, unha intervención integral, un desenvolvemento presencial e en liña coa posibilidade de participación do teu médico e un marcado carácter educativo en todo o proceso.
“Por iso quero convidar a todas as persoas que pretendan cambiar de rutinas, e estean dispostas a emprender unha nova viaxe, para que se acheguen á charla que vou impartir, para que escoiten o meu método e ao mesmo tempo tamén poidan preguntar e consultar todas as súas dúbidas”, di Fernández.
