O alcalde da Pontenova, Darío Campos Conde, vén de anunciar que o Pleno do Concello acordou por unanimidade nomear a Miguel A. Piñeiro Moure, Fillo Adoptivo da Vila.
Dende o Concello destacan que conceden este nomeamento “en aras do seu excelente facer profesional cara as terras e as xentes da Pontenova, así como o traballo desenvolvido especialmente na defensa das augas e a biodiversidade do río Eo”. Por iso invitan a toda veciñanza “a sumarse á xornada de homenaxe a Miguel Piñeiro co nomeamento de Fillo Adoptivo da Pontenova. O acto público de recoñecemento celebrarase o venres 29 de abril, no Auditorio a partir das 20.00 horas”.
COLABORADOR DA FESTA DA TROITA
Miguel Piñeiro é xornalista da CRTVG, Director Editorial de Xornal Trueiro, ten publicados 10 libros, é colaborador de diversos medios de comunicación galegos e nacionais. Ademais é todo un referente no mundo da pesca deportiva e do medio natural, tamén exerce como Director Técnico do Couto Turístico de Vilagudín, é Artesán da Pesca inscrito no Rexistro Xeral da Xunta de Galicia, e ven colaborando con numerosas iniciativas pontenovesas dende xa hai anos, entre elas e especialmente, a Festa da Troita.
