Os días 19 e 20 de agosto, a Ribeira Sacra acollerá o Trece Roeis Fest, onde se poderá desfrutar da música de El Drogas, Boikot, Guezos, Zeltia Irevire, Cabodano e As Searas.
Un ano máis, a organización quere consolidar un espazo de cultura e música popular na que se sintan identificadas tódalas veciñas e veciños da Ribeira Sacra.
Dito evento é feito en “O Castro” de Sta. María de Ferreira, Pantón. Consta de varios espazos nos que se mesturan a gastronomía da terra coa cultura e a artesanía, facendo unha simbiose perfecta. Así mesmo, coa organización deste evento búscase que traia consigo beneficios económicos para Pantón e para os concellos limítrofes.
Cada ano o obxectivo é que siga crecendo ata conseguir que sexa un punto de referencia cultural e musical non só na Ribeira Sacra senón no resto de Galicia, e sirva como punto de atracción para que xente doutros lugares se poida acercar durante esa fin de semana a desfrutar das ribeiras e da riqueza paisaxística e gastronómica da terra Sacra.
O Trece Roeis Fest busca aportar un gran máis para conseguir que a Ribeira Sacra sexa declarada Patrimonio da Humanidade nos vindeiros anos despois de haber sido declarada Reserva da biosfera pola UNESCO, así coma potenciar o camiño de inverno que pasa pola bisbarra.
ORIXE
Trece Roeis Fest nace pola inquietude dun grupo de amigas e amigos da Ribeira Sacra, que a pesar de ser de diferentes idades e gustos, deciden apostar pola Cultura en diferentes espazos, creando unha marca por e para o pobo no que ano tras ano sexa máis recoñecible en todo o país. A organización deste evento corre ó cargo da Asociación Cultural “Os Trece Roeis”, tendo o seu seo no Concello de Pantón, pero contando con colaboradores e colaboradoras dos distintos municipios do redor como O Saviñao, Sober ou Monforte entre outros.
