Os mellores caldos da Denominación de Orixe Ribeira Sacra danse cita esta fin de semana na tradicional Feira do Viño de Chantada. Dende esta tarde, ás 20 horas, propios e estraños poderán degustar as distintas variedades de viños novos, tanto brancos coma tintos.
Así, ás 20.00 horas terá lugar a apertura dos stands das adegas participantes, comezarán os cantos de taberna a cargo de Son Outeiro e a charanga Unión Phenosa que animarán a zona ata ás 23,00 horas cando os asistentes poderán gozar do grupo Claxxon.
No día de mañá, sábado 4, a festa arrancará ás 11.00 horas, cos gaiteiros Os Barrios e Searas que animarán as rúas. Ás 12.00 horas será o turno do concerto da Agrupación Tradicional da Casa da Música e, ás 13.00 horas p turno da Banda de Música Municipal de Chantada.
Pola tarde, ás 17.00 horas comezarán as actuacións coas charangas Mekanika, Festicultores Troupe e Searas. Música que dará inicio á VI Cata Popular. Á noite, a orquestra Pontevedra farase cargo da verbena.
A cata oficial da XXXIX Feira do Viño de Chantada arrancará o domingo ás 10.30 horas coa animación musical dos gaiteiros Os Barrios. A charanga NBA e a Banda de Gaitas do concello amenizarán a mañá ata ás 13.00 horas cando se levará a cabo a lectura do pregón.
Ao longo da tarde, diferentes grupos musicarán á festa que rematará a partir das 21.00 horas coa verbena a cargo da orquestra Saudade.
