Continúan esta semana as xornadas de verán Os catro elementos organizadas pola delegación de Lugo de ADEGA coas que pretenden achegar as persoas á natureza a través da poesía, atendendo aos cantos das aves, achegándose a mámoas onde observar estrelas e reconstruíndo un valado de pedra coa técnica de xunta seca.
Esta semana teñen programadas dúas actividades, o venres 26 de agosto, de 23.00 a 02.00 unha andaina nocturna e observación de estrelas que terá lugar na parroquia de Guldriz, en Friol. Observarase o ceo nocturno na finca Rego Salgueiro na que se atopa a mámoa nº2 da necrópole Costa de Mera. Nun pequeno percorrido nocturno, chegarase ata a medorra, onde observarán o ceo e as estrelas.
O domingo 28 de agosto, de 11.00 a 14.00 haberá unha roda poética e andaina ata a Fábrica da Luz no Paseo do Miño en Lugo. Nesta ocasión xuntaránse ao redor dunha roda, na que contarán con poetas de Lugo e da provincia, e con todas as persoas que queiran adicar unhas verbas á natureza, a auga ou aos catro elementos.
Todas as actividades son de balde pero é preciso inscribirse chamando ao 982 240 299 ou escribindo a adegalugo@adega.gal indicando nome, apelidos, DNI e teléfono de contacto.